Haapata Wiremu (1908)

1 KUA WHAKATUURIA KO PATAWHIIRA, B.A., B.D., hei maahita mo Waerenga-a-hika, aa, ko Riiwai Hiwinui Taawhiri te kai whakaako i raro i a Patawhiira. He minita raaua tokorua.

Ko nga mea e whakaakoria:

2 He karaipiture;

3 He reo Ingarihi, araa, he tuhituhi, he koorero pukapuka;

4 He ture mo te aahua o te noho, mo te aahua o te tiaki i te tinana;

5 He whika ki te karaihe tuawhaa, me eetahi wehewehenga o te whika ki nga mahi whakakiko i waho o te kura;

6 He mahi ahu-whenua, araa he ako i nga huarahi e puta ake ai he oranga i roto i te eka oneone;

7 He hanga tuuru, teepu, kaapata, pouaka, haamaka me eeraa atu mahi whakapaipai o roto o te whare;

8 He mahi paamu, araa, kuuteetee kau, whaangai poaka, tiaki pouaka pii, me eeraa atu e whai oranga ai te pani me te rawakore;

9 He whakatuutuu hei whakamaarooroo i nga uaua;

10 He mahi tao kai, tiaki i te whare, paati tarau me eeraa atu mahi katoa o roto o te whare.

11 Ko te mea e whaaia ana i runga i eenei tuu whakahaere ko te ako i te tamaiti kia moohio ki nga tikanga e whiwhi ai toona tinana ake ki te pai, kia tipu ai te iwi Maaori i runga i nga huarahi o te Paakehaa me toona maatauranga. Ka akongia nga tamariki ki eenei mahi katoa i runga tonu i te whenua ake o te Kaareti. Ma nga tamariki anoo e ono he parareka, he kaapeti, he hue, he kaanga ma raatou, aa, ma raatou hoki e whakapai nga kaari me te marae katoa o te Kaareti.