Na Te Whatahoro pea?
1 KO TEENEI TANGATA KO KUPE, he tangata rangatira no Hawaiki. I teetahi waa ka tipu ta raaua kakari ko Muturangi. Te take o ta raaua whawhai, mo te mookai a Muturangi. Taua mookaikai he wheke.
2 I haere atu a Kupe me oona taangata ki te hii ika. Ka eke ki runga i te tauranga ika, ka rere nga aho a oona taangata ki te wai. Ka roa, kaaore e rongo ana ki te ika e kai ana mai ki nga matau. Ka huutia ake nga aho, kua pau noa atu nga moounu o nga matau. Peeraa katoa nga waka e tau ana i runga i te tauranga ika.
3 Ka moounu anoo nga taangata o runga i nga waka ra i a raatou matau, ka rere anoo nga aho ki te wai. Ka roa e tau ana nga aho i te wai, ka takina ake anoo. Kua pau noa atu nga moounu. Ka peenaa tonu, aa, pau noa nga moounu. Ka hoki nga waka katoa ki uta, ka koorerotia te mate o nga kai-hii ika nei.
4 Ka kimi nga taangata he aha ra i peeraa ai? Kaatahi ka kawea ki nga tohunga tuuaahu kia kimihia te take i peeraa ai te aahua o aa raatou aho, me nga moounu. Ka kii atu nga tohunga tuuaahu, ‘Ka haere koutou a muri ake nei ki te hii, mauria mai nga aho me nga matau ki a maatou i te ata e haere ai. Kia mahia, ka haere ai.’
5 I te ata i whakaarotia ai kia haere ki te hii, ka kawea nga aho, nga matau ki nga tohunga tuuaahu kia mahia. Ka oti te mahi ka haere nga waka ki nga taunga ika i te moana, ka hii. Kaatahi ka kitea nga kawekawe o te wheke e pupuri ana i nga aho. Tinitini te wheke! Ka kitea taua wheke a Muturangi e tau ana i runga i te kare o te wai, maanu ai. Kaatahi ka moo-hiotia kua pau noa ake nga moounu i nga wheke te kai. Ka moohiotia hoki na Muturangi taua mahi. Ka mataku nga taangata i te wheke a Muturangi, ka hokihoki nga waka ki te tuawhenua.
6 Kaatahi ka haere a Kupe ki a Muturangi, ka kii atu, ‘E taa, kei a koe tonu to maatou mate!’
7 Ka mea mai a Muturangi, ‘Kaaore i a au te take i haere atu ai nga mookaikai na ki konaa!’
8 Ka kii atu a Kupe, ‘Purutia iho to wheke! Kaua hei tukua atu ki te moana! E haere ana nga waka aapoopoo ki te hii ika!’
9 Ka haere nga taangata hii ika, tae atu, ka hii. Peeraa tonu te aahua, ko taua wheke anoo i reira. Ka hoki anoo nga taangata ki te tuawhenua, ka koorerotia atu ko taua aahua anoo, i reira te wheke a Muturangi e tau ana.
10 Ka haere a Kupe ki te kaainga o Muturangi, ka koorero atu ki a Muturangi ki te kino o tana mookai ki nga moounu a oona taangata hii ika. ‘I haere mai ahau ki a koe, kia patua e koe to mookai!’
11 Ka mea mai a Muturangi, ‘E kore au e whakaae kia mate noa taku mookai. Noona toona kaainga i te moana. No te tangata te hee ki te haere atu i to raatou na kaainga, patu ai i a ia.’
12 Ka kii atu a Kupe, ‘Aa! ka kore koe e tiaki i to mookai ka patua e au!’
13 Ka mea mai a Muturangi, ‘E kore e mate i a koe!’
14 Ka mea atu a Kupe, ‘E pai ana! Ki te mate ia i a au, ka mate i a au!’
15 Ka hoki a Kupe ki te kaainga ka mea atu ki toona iwi, ‘Mahia taku waka kia pai.’ Ka mahia a Maataa-hoorua, ka haere a Kupe ki te patu i a Wheke.
16 Ka takoto tonu te wheke a Muturangi i runga i te kare o te wai. Te nui o taua wheke e toru whanganga o te tinana. Ko nga kawekawe e rima whanganga te roroa. Ko nga whatu e rite ki te paaua te nui o oona whatu. Na, ka tahuri raatou ki te whaiwhai i taua wheke nei. Kaaore hoki e tata ana nga waka ki taua wheke. Ka oma mai ia ki te moana waipuu, araa ki te moana hoohonu.
17 Ka poo, ka hoki a Kupe, ka whai tonu mai te hoa, a Ngake, me toona waka, a Tawiri-rangi, i a Wheke.
18 Ka mea a Kupe ki oona kai-hoe, ‘Me aata mahi he kai mo to taatou waka, kia nui, kia haere tonu ai taatou i te moana, aa, kia mate ra anoo i a taatou.’
19 Ka whakaae nga hoa. Ka tangi a Hine-i-te-apaarangi me ana tamaahine ki a Kupe kia noho, kia waiho atu ma oona taangata e whaiwhai, kei rokohanga ia e te tuupuhi ki te moana, ka mate ia. Ka riri a Kupe. Kaatahi ka kii atu, ‘Kaati! kua waitohutia e koutou, teeraa au e mate. Hoake ki runga i te waka koutou ko oo tamariki, kia kotahi ai to taatou matenga, kei mate ko au anake, ka tiikapa noa ake koutou i uta nei.’
20 Ka whakaae katoa nga tamariki tokorima kia haere mai raatou. Ko te take teenei i haere mai ai a Hine-i-te-apaarangi me ana tamariki i runga i a Maataa-hoorua. Ka hoe mai te waka o Kupe. Ka tae mai ki Tuahiwi-nui-o-hine-moana ka mau mai te waka o Ngake i a Kupe.
21 Ka ui atu a Kupe, ‘Kei te kitea anoo, e Ngake?’
22 Ka mea atu a Ngake, ‘E mura haere atu ra i runga i te kare moana.’
23 Ka titiro atu hoki a Kupe, ‘E, koia anoo! Ka whai atu kia tata atu.’
24 Kaaore, ka neke atu anoo! Te tere o te haere o te wheke! Ka whakamau tonu mai te haere a Wheke ki teenei motu.
25 Ka whai tonu mai i a Wheke. Ka tata mai ki Muri-whenua, i te hiku o te motu nei, ka ahu whaka-te-tonga te upoko o Wheke, ka tika mai ma te raawhiti.
26 Ka karanga atu a Kupe ki a Ngake. ‘Haere, e whai i ta taaua ika.’
27 Ka tata te tae ki Te Wai-pounamu, ka kitea atu e haere mai ana te wheke a Muturangi. Ka wehe nga waka, to Ngake me to Kupe, kia tika ai te wheke a Muturangi ma waenganui i oo raaua waka. Ka haere mai te ika ra, tika tonu ma waenganui o nga waka e rua nei. Ka puta te upoko i nga waka nei, e too mai ana anoo nga kawekawe i waho noa atu o nga waka e rua nei.
28 Ka tuu teetahi tangata i waenganui o te waka o Kupe, me te raakau huata. Ka tuu! Ka tuu hoki to Ngake huata. Ka rua nga raakau ki roto i te ika nei, ka rongo mamae te ika nei. Kaatahi ka haere nga kawekawe ki te whawhati i te raakau a Ngake. Ka whati te huata a Ngake, ka whati hoki te raakau a Tohi i konei.
29 Ka mau nga kawekawe ki nga niao o te waka o Ngake, i te ihu tae noa ki te kei. Ka tahuri te waka o Ngake. Ka rarahu nga kawekawe o te tipua nei ki te waka o Kupe. Ka mau a Kupe ki tana toki, ka topetopea nga kawekawe i konei.
30 Ka karanga a Kupe, ‘Makaia nga tahaa na ki te upoko o te ika nei.’
31 Ka makaia. Ka mahara pea te tipua nei he tangata. Ka mahue te pupuri i te waka, ka hui nga kawekawe ki nga tahaa ra. Kaatahi anoo ka paoa te toki a Kupe. Ka paoa tonutia i te upoko, ka pakaru te upoko me nga karu e rua. Ka mate te wheke a Muturangi i konei.